Өрөспүүбүлүкэтээҕи көр-күлүү күөн күрэстэрин хас да төгүллээх кыайыылаахтара, лауреаттара, “Тэбэнэттэр” көр-күлүү бөлөх артыыстара — СӨ култууратын туйгуна, Хоноҕордооҕу “Түһүлгэ” сынньалаҥ киин уус-уран салайааччыта Валентина Сергеевна Бубякина, Суоттутааҕы “Мичээр” сынньалаҥ киин үлэһитэ Христина Николаевна Неустроева 30 сыллаах айар киэһэлэрин бар дьонноругар бэлэхтээтилэр. Кинилэри эҕэрдэлии кэлбит өрөспүүбүлүкэбит, улууспут көр-күлүү бөлөхтөрө, биллиилээх ырыаһыттар олус чаҕылхай нүөмэрдэри көрдөрөн Суотту көрөөччүлэрин сэргэхситтилэр.
СӨ үтүөлээх артыыҺа Сайыына, Саха эстрадатын сулуһа Сандал, СӨ култууратын туйгуна Светлана Гоголева-Сергеева, Горнай улууһуттан «Дьиикимдэ дьээбэлэрэ» бөлөх, Мэҥэ Хаҥаластан Дьулустаан Брызгалов, Мүрүттэн «Бэрт бэтиэхэлэрэ» бөлөх , «Виктория» араадьыйа ыытааччыта, саха Меладзета Иннокентий Алексеев талба талааннарын хайгыы, сөҕө көрдүбүт. Дьоро киэһэни кыайа-хото тутан иилээн-саҕалаан ыытта Бороҕоннооҕу. В.В. Никифороа-Күлүмнүүр аатынан «Тойон Мүрү» култуура дыбарыаһын уус-уран салайааччыта Александр Гоголев-Лоокуут.
Суотту нэһилиэгин култууратын эйгэтигэр үлэлээн, улуус, өрөспүүбүлүкэ култууратын сайдыытыгар сүҥкэн кылааттарын киллэрбит, «Тэбэнэттэр» көр-күлүү бөлөҕүн тэрийбит Иннокентий Киренскэй, сцена чаҕылхай артыыстара Афанасий Охлопков, Виктор Портнягин, Василий Заровняев утумнааччылара билиҥҥи «Тэбэнэттэр» тэбэнэттээх артыыстара Валентина Бубякина, Христина Неустроева, Мария Заровняева, Марфа Аржакова, Вия Пермякова, Алена Мохноносова, Ирина Осипова, Валентина Патрасова көрдөөх сценкаларынан, саҥа туруорууларынан нэһилиэк олохтоохторун күллэрэ-үөрдэ сылдьаллар.
Дьону күллэрии курдук ускуустуба уустук көрүҥүн баһылаан айа-тута сылдьар дьоммутугар баҕарабыт туйгун туругу, өссө үрдүк ситиһиилэри.
Уус Алдан улууһун култуураҕа салалтатын сүрүннүүр испэсэлииһэ Анна Егоровна Лугинова Валентина Сергеевнаҕа «Улууска култуура сайдыытыгар кылаатын иһин» бэлиэни, Христина Николаевнаҕа Уус Алдан улууһун дьаһалтатын Бочуотунай грамотатын, Суотту нэһилиэгин баһылыга Василий Петрович Баишев олохтоох дьаһалта Бочуотунай грамотатын туттардылар.
